સરખેજ-ધોલેરા-બાવળિયાળી રેલવે લાઇન: અમદાવાદના ફતેહવાડીમાં જમીન સંપાદન માટે નોટિફિકેશન, ૩૦ દિવસમાં વાંધા રજૂ કરો

પશ્ચિમ રેલવેએ સરખેજ–ધોલેરા–બાવળિયાળી નવી બ્રોડગેજ ડબલ લાઇન અને લોથલ–ધોલેરા એરપોર્ટ સ્પુર લાઇન માટે અમદાવાદ જિલ્લાના વેજલપુર તાલુકાના ફતેહવાડી ગામમાં ૪.૧૨ હેક્ટર ખાનગી જમીન સંપાદિત કરવાનો ઈરાદો જાહેર કર્યો છે. કેન્દ્ર સરકારના રેલવે મંત્રાલયે રેલવે અધિનિયમ, ૧૯૮૯ની કલમ ૨૦-એ હેઠળ આ અંગેનું ગેઝેટ નોટિફિકેશન બહાર પાડ્યું છે.

આ સ્પેશિયલ રેલવે પ્રોજેક્ટ હેઠળ સરખેજથી ધોલેરા થઈને બાવળિયાળી વચ્ચે ૧૦૯.૧૬ કિલોમીટર લાંબી નવી બીજી ડબલ લાઇન અને લોથલ એનએચએમસી (નેશનલ મેરીટાઇમ હેરિટેજ કોમ્પ્લેક્સ)થી ધોલેરા એરપોર્ટ સુધી ૨૦.૪૦ કિલોમીટરની સ્પુર લાઇન નાખવામાં આવનાર છે.

ફતેહવાડી ગામની ખેતી અને બિનખેતી જમીન સંપાદિત થશે

ગેઝેટમાં પ્રસિદ્ધ કરાયેલી યાદી મુજબ અમદાવાદ જિલ્લાના વેજલપુર તાલુકાના ફતેહવાડી ગામમાં કુલ ૪૧,૨૮૮ ચોરસ મીટર (૪-૧૨-૮૮ હેક્ટર) જમીન સંપાદનમાં આવરી લેવાશે. આ તમામ જમીન ખાનગી માલિકીની છે.

તેમાં નીચે મુજબના સર્વે નંબરોનો સમાવેશ થાય છે:

• સર્વે નંબર ૫૨૫/૨: ખેતીની જમીન (૫૩ ચોરસ મીટર)
• સર્વે નંબર ૫૨૬: ખેતીની જમીન (૫૩ ચોરસ મીટર)
• સર્વે નંબર ૨૯૭: ખેતીની જમીન (૫,૭૧૦ ચોરસ મીટર)
• સર્વે નંબર ૨૯૬/૨ અને ૨૯૬/૩: ખેતીની જમીન (૨,૫૬૮ ચોરસ મીટર)
• સર્વે નંબર ૨૭૬/૧ અને ૨૭૬/૨: બિનખેતી જમીન (૩,૦૧૪ ચોરસ મીટર)
• સર્વે નંબર ૨૯૮: ખેતીની જમીન (૪૦૫ ચોરસ મીટર)
• સર્વે નંબર ૩૦૦: ખેતીની જમીન (૨૯ ચોરસ મીટર)
• સર્વે નંબર ૨૬૪ + ૨૬૫ + ૨૭૧ + ૨૭૨ + ૨૭૩: બિનખેતી જમીન (૮,૩૭૯ ચોરસ મીટર)
• સર્વે નંબર ૨૨૮ + ૨૨૫ + ૨૨૭ + ૨૩૦ + ૨૩૧: બિનખેતી જમીન (૧૦,૦૪૬ ચોરસ મીટર)
• સર્વે નંબર ૨૩૬થી ૨૪૨/૧, ૨૩૬થી ૨૪૨ પૈકી તથા ૨૪૩: ખેતીની જમીન (૧૦,૮૪૬ ચોરસ મીટર)
• સર્વે નંબર ૨૬૦: ખેતીની જમીન (૧૮૫ ચોરસ મીટર)

વાંધા રજૂ કરવા ૩૦ દિવસની મુદત

નોટિફિકેશન મુજબ, આ જમીન સંબંધિત કોઈપણ હિત ધરાવતી વ્યક્તિ ગેઝેટમાં અધિસૂચના પ્રસિદ્ધ થયાની તારીખથી ૩૦ દિવસની અંદર પોતાનો વાંધો લેખિતમાં રજૂ કરી શકે છે.

વાંધા અરજી સક્ષમ પ્રાધિકારી અને અધિક વિશેષ દ્વિતીય જમીન સંપાદન અધિકારી, પ્રથમ માળ, આપત્તિ વ્યવસ્થાપન ભવન, મહેસૂલ ભવન, કલેક્ટર કચેરી, સુભાષ બ્રિજ સર્કલ પાસે, અમદાવાદ ખાતે આપવાની રહેશે.

અરજીમાં વાંધાનો ચોક્કસ આધાર જણાવવાનો રહેશે. સક્ષમ અધિકારી વાંધાકર્તાને રૂબરૂ અથવા વકીલ મારફતે સુનાવણીની તક આપશે અને તપાસ બાદ વાંધો માન્ય કે અમાન્ય રાખવા અંગે આદેશ કરશે. આ અંગે સક્ષમ સત્તાધિકારીનો આદેશ અંતિમ રહેશે.

આ નોટિફિકેશન હેઠળ આવતી જમીનના નકશા અને પ્લાન સક્ષમ અધિકારીની કચેરીએ તપાસ માટે ઉપલબ્ધ છે. રસ ધરાવતી વ્યક્તિઓ ત્યાં જઈને તેનું નિરીક્ષણ કરી શકે છે.

આ અંગેનું સત્તાવાર જાહેરનામું ભારત સરકારના ગેઝેટ પર જોઈ શકાય છે.