બારેજડી-સાણંદ ચોથી રેલવે લાઇન: સાણંદના ગોધાવીમાં ૭૯,૦૫૭ ચોરસ મીટર જમીન સંપાદન માટે નોટિફિકેશન જાહેર

કેન્દ્ર સરકારના રેલવે મંત્રાલયે અમદાવાદ જિલ્લામાં ગેરાતપુર (બારેજડી-નાંદેજ)થી સાણંદ વચ્ચે ૩૮.૨૦ કિલોમીટર લાંબી ચોથી રેલવે લાઇન પ્રોજેક્ટ માટે સાણંદ તાલુકાના ગોધાવી ગામમાં ૭૯,૦૫૭ ચોરસ મીટર ખાનગી જમીન સંપાદિત કરવાની સત્તાવાર જાહેરાત કરી છે. રેલવે એક્ટ, ૧૯૮૯ની કલમ ૨૦(એ) હેઠળ આ અંગેનું નોટિફિકેશન બહાર પાડવામાં આવ્યું છે.

પશ્ચિમ રેલવે (નિર્માણ સંગઠન) હેઠળ આ વિશેષ રેલવે પરિયોજના હાથ ધરવામાં આવી રહી છે. ગોધાવી ગામની ખેતી અને બિન-ખેતી (NA) બંને પ્રકારની ખાનગી જમીન આ ચોથી લાઇનના વિસ્તરણ માટે લેવામાં આવશે.

વાંધા રજૂ કરવા ૩૦ દિવસની મુદત

ગેઝેટમાં આ જાહેરનામું પ્રસિદ્ધ થયાની તારીખથી ૩૦ દિવસની અંદર કોઈપણ અસરગ્રસ્ત કે હિત ધરાવતી વ્યક્તિ જમીન સંપાદન સામે પોતાનો વાંધો નોંધાવી શકશે.

વાંધા અરજી લેખિતમાં કારણો સાથે નીચે દર્શાવેલા સક્ષમ અધિકારી સમક્ષ રજૂ કરવાની રહેશે:

• અધિકારી: સક્ષમ પ્રાધિકારી અને અધિક વિશેષ જમીન સંપાદન અધિકારી
• સરનામું: પહેલો માળ, આપત્તિ વ્યવસ્થાપન ભવન, મહેસૂલ ભવન, કલેક્ટર કચેરી, સુભાષ બ્રિજ સર્કલ પાસે, અમદાવાદ

સક્ષમ પ્રાધિકારી વાંધા રજૂ કરનારને રૂબરૂમાં અથવા તેમના કાયદાકીય પ્રતિનિધિ (વકીલ) મારફતે સુનાવણીની તક આપશે. તમામ સુનાવણી અને જરૂરી તપાસ બાદ કલમ ૨૦(ડી) હેઠળ અધિકારી દ્વારા જે હુકમ કરવામાં આવશે તે આખરી રહેશે.

ગોધાવી ગામના સર્વે નંબરો

રેલવે વિભાગે ગોધાવી ગામના કુલ ૩૬ જેટલા સર્વે નંબરોમાંથી ૭૯,૦૫૭ ચોરસ મીટર (લગભગ ૭.૯ હેક્ટર) જમીન સંપાદન માટે ઓળખી કાઢી છે. જેમાં સર્વે નંબર ૧૧૮૩, ૧૧૮૪, ૧૧૮૦, ૧૧૭૯/૩/૨, ૧૧૭૮, ૧૧૩૬/૨, ૧૧૩૬/૧, ૧૧૩૭, ૧૧૩૯, ૧૧૪૧, ૧૧૪૦, ૧૧૪૯/૨/૩, ૧૧૧૩/૨, ૧૧૫૦, ૧૧૫૨, ૧૧૧૧, ૮૨૫, ૮૨૪, ૮૨૩, ૭૬૫, ૭૫૮, ૭૫૭, ૭૬૧, ૭૧૭, ૭૧૪/૨+૭૧૨, ૪૯૬, ૭૫૩+૭૫૪+૭૫૫, ૭૫૦, ૭૨૨, ૭૪૮, ૭૨૭/૨, ૭૩૧, ૭૩૨/૧, ૭૩૩, ૭૩૪ અને ૭૩૫નો સમાવેશ થાય છે.

આ નોટિફિકેશન હેઠળ આવતી જમીનનો ચોક્કસ પ્લાન અને અન્ય વિગતો અમદાવાદ કલેક્ટર કચેરી ખાતે આવેલી સક્ષમ પ્રાધિકારીની કચેરીએ જોઈ શકાશે. વધુ વિગત માટે ભારત સરકારના સત્તાવાર ગેઝેટ નોટિફિકેશન પર વિગતો તપાસી શકાશે.