સરખેજ-ધોલેરા રેલવે લાઇન: બાદરાબાદમાં ૫.૮૦ હેક્ટર જમીન સંપાદન માટે નોટિફિકેશન, ૩૦ દિવસમાં વાંધા રજૂ કરો

પશ્ચિમ રેલવેએ સરખેજ–ધોલેરા–બાવળિયાળી ૧૦૯.૧૬ કિમી નવી બ્રોડગેજ ડબલ લાઇન અને લોથલ–ધોલેરા એરપોર્ટ ૨૦.૪૦ કિમી સ્પુર લાઇન પ્રોજેક્ટ માટે અમદાવાદ જિલ્લાના વેજલપુર તાલુકાના બાદરાબાદ ગામમાં ૫.૮૦ હેક્ટર જમીન સંપાદિત કરવાનો ઈરાદો જાહેર કર્યો છે. કેન્દ્ર સરકારના રેલવે મંત્રાલયે રેલવે અધિનિયમ, ૧૯૮૯ની કલમ ૨૦-એ હેઠળ આ અંગેનું ગેઝેટ નોટિફિકેશન બહાર પાડ્યું છે.

આ સ્પેશિયલ રેલવે પ્રોજેક્ટ હેઠળ સરખેજથી ધોલેરા થઈને બાવળિયાળી વચ્ચે ૧૦૯.૧૬ કિલોમીટર લાંબી નવી બીજી ડબલ લાઇન અને લોથલ એનએચએમસી (નેશનલ મેરીટાઇમ હેરિટેજ કોમ્પ્લેક્સ)થી ધોલેરા એરપોર્ટ સુધી ૨૦.૪૦ કિલોમીટરની સ્પુર લાઇન તૈયાર કરવાની કામગીરી ચાલી રહી છે.

બાદરાબાદ ગામની ૫૮,૦૦૦ ચોરસ મીટર જમીન લેવાશે

ગેઝેટમાં પ્રસિદ્ધ કરાયેલી સૂચિ મુજબ અમદાવાદ જિલ્લાના વેજલપુર તાલુકાના બાદરાબાદ ગામમાં કુલ ૫૮,૦૦૦ ચોરસ મીટર (૫-૮૦-૦૦ હેક્ટર) જમીન સંપાદનમાં આવરી લેવાશે. આ તમામ જમીન ખાનગી માલિકીની છે, જેમાં ખેતી તેમજ બિનખેતી જમીનનો સમાવેશ થાય છે.

સંપાદન હેઠળ આવતા મુખ્ય સર્વે નંબરો અને ક્ષેત્રફળ:

• સર્વે નંબર ૮૨/A/૨, ૮૨/A/૩, ૮૨/A/૯ (ખેતી) અને ૮૨/B (બિનખેતી): કુલ ૧,૮૯૭ ચોરસ મીટર
• સર્વે નંબર ૮૦: ખાનગી ખેતીની જમીન, ૩,૮૦૬ ચોરસ મીટર
• સર્વે નંબર ૭૯: ખાનગી ખેતીની જમીન, ૧,૭૫૯ ચોરસ મીટર
• સર્વે નંબર ૭૮: ખાનગી ખેતીની જમીન, ૧,૩૯૬ ચોરસ મીટર
• સર્વે નંબર ૭૭/A, ૭૭/K, ૭૭/B: ખાનગી ખેતીની જમીન, ૪,૨૩૩ ચોરસ મીટર
• સર્વે નંબર ૯૯: ખાનગી ખેતીની જમીન, ૧,૩૨૭ ચોરસ મીટર
• સર્વે નંબર ૧૦૩: ખાનગી ખેતીની જમીન, ૪,૬૦૨ ચોરસ મીટર
• સર્વે નંબર ૧૦૨: ખાનગી બિનખેતી જમીન, ૨,૧૦૫ ચોરસ મીટર
• સર્વે નંબર ૧/A, ૧/K/૧, ૧/K/૨, ૧/K/૩, ૧/D: ખાનગી ખેતીની જમીન, ૮,૧૬૨ ચોરસ મીટર
• સર્વે નંબર ૩૦: ખાનગી ખેતીની જમીન, ૩૫૭ ચોરસ મીટર
• સર્વે નંબર ૨/૩ અને ૨/૪: ખાનગી ખેતીની જમીન, ૮૫૫ ચોરસ મીટર
• સર્વે નંબર ૨૯: ખાનગી ખેતીની જમીન, ૭,૨૯૩ ચોરસ મીટર
• સર્વે નંબર ૩૫: ખાનગી ખેતીની જમીન, ૯૩ ચોરસ મીટર
• સર્વે નંબર ૨૮/A, ૨૮/E, ૨૮/K, ૨૮/G, ૨૮/D/૧, ૨૮/D/૨ (ખેતી) અને ૨૮/B (બિનખેતી): કુલ ૯,૫૦૧ ચોરસ મીટર
• સર્વે નંબર ૪૦ પૈકી: ખાનગી ખેતીની જમીન, ૧૦,૬૧૪ ચોરસ મીટર

વાંધા રજૂ કરવા ૩૦ દિવસની મુદત

આ નોટિફિકેશન મુજબ, સંબંધિત જમીનમાં હિત ધરાવતી કોઈપણ વ્યક્તિ ગેઝેટમાં અધિસૂચના પ્રસિદ્ધ થયાની તારીખથી ૩૦ દિવસની અંદર પોતાનો વાંધો લેખિતમાં રજૂ કરી શકે છે.

વાંધા અરજી સક્ષમ પ્રાધિકારી અને અધિક વિશેષ દ્વિતીય જમીન સંપાદન અધિકારી, પ્રથમ માળ, આપત્તિ વ્યવસ્થાપન ભવન, મહેસૂલ ભવન, કલેક્ટર કચેરી, સુભાષ બ્રિજ સર્કલ પાસે, અમદાવાદ ખાતે લેખિતમાં આપવાની રહેશે. અરજીમાં વાંધાનો ચોક્કસ આધાર દર્શાવવો જરૂરી છે.

સક્ષમ પ્રાધિકારી વાંધાકર્તાને રૂબરૂ અથવા અધિકૃત વકીલ મારફતે સુનાવણીની તક આપશે. સુનાવણી અને જરૂરી તપાસ બાદ તેઓ વાંધા માન્ય કે અમાન્ય રાખવાનો આદેશ કરશે. આ અંગે સક્ષમ સત્તાધિકારીનો આદેશ આખરી ગણાશે.

સંપાદન હેઠળની જમીનના નકશા અને વિગતો સક્ષમ અધિકારીની કચેરીએ ઉપલબ્ધ છે અને હિત ધરાવતા લોકો ત્યાં જઈને તે જોઈ શકે છે.

આ અંગેનું સત્તાવાર જાહેરનામું ભારત સરકારના ગેઝેટ પર વાંચી શકાય છે.