GSSSBમાં સ્ટાફ નર્સની ૧૩૧ જગ્યા પર ભરતી, ૧૨ ઓક્ટોબર સુધીમાં કરો ઓનલાઇન અરજી
જાહેરાત ક્રમાંક GSSSB/202627/458 હેઠળ સ્ટાફ નર્સ, વર્ગ-૩ની ૧૩૧ જગ્યા છે. અરજી ojas.gujarat.gov.in પર કરવાની રહેશે.
ગુજરાત ગૌણ સેવા પસંદગી મંડળ (GSSSB) એ સ્ટાફ નર્સ, વર્ગ-૩ની કુલ ૧૩૧ જગ્યાઓ પર ભરતીની જાહેરાત કરી છે. આ જગ્યાઓ આરોગ્ય અને પરિવાર કલ્યાણ વિભાગના નિયંત્રણ હેઠળના નિયામકશ્રીની કચેરી તથા કામદાર રાજ્ય વીમા યોજનાની કચેરી હેઠળ છે.
અરજી ક્યારથી ક્યાં સુધી
ઉમેદવારો ojas.gujarat.gov.in પર તા. ૨૮/૦૯/૨૦૨૬થી તા. ૧૨/૧૦/૨૦૨૬ના રાત્રે ૧૧.૫૯ કલાક સુધી ઓનલાઇન અરજી કરી શકશે. અરજી માટે OJAS પર OTR (One Time Registration) રજિસ્ટ્રેશન જરૂરી છે, જે નથી તેમણે પહેલાં કરાવવાનું રહેશે.
જાહેરાત ક્રમાંક GSSSB/202627/458 છે.
ફી
બિનઅનામત વર્ગના ઉમેદવારોએ પ્રાથમિક પરીક્ષાની ફી રૂ. ૫૦૦ અને અનામત વર્ગના ઉમેદવારોએ રૂ. ૪૦૦ ઓનલાઇન ભરવાની રહેશે. ફી ભરવાની છેલ્લી તારીખ ૧૫/૧૦/૨૦૨૬ (રાત્રે ૨૩:૫૯ કલાક) છે.
લાયકાત અને વય
- B.Sc. (Nursing)ની ડિગ્રી, જે Gujarat Nursing Council કે Indian Nursing Council દ્વારા માન્ય હોય, અથવા Gujarat Nursing Council કે Indian Nursing Council દ્વારા માન્ય સંસ્થામાંથી General Nursing Midwiferyનો ડિપ્લોમો.
- કમ્પ્યૂટર એપ્લિકેશનનું બેઝિક નોલેજ.
- ગુજરાતી કે હિન્દીનું પૂરતું જ્ઞાન.
જે ઉમેદવારો અરજી કરતી વખતે કાઉન્સિલમાં રજિસ્ટર્ડ નથી તેમણે નિમણૂક પહેલાં રજિસ્ટ્રેશન કરાવી લેવાનું રહેશે.
વયમર્યાદા તા. ૧૨/૧૦/૨૦૨૬ના રોજ ૧૮ થી ૩૫ વર્ષ છે. અનામત વર્ગ, દિવ્યાંગ અને માજી સૈનિક ઉમેદવારોને નિયમ મુજબ ઉપલી વયમર્યાદામાં છૂટછાટ મળશે. લાયકાત અને વય માટેની નિર્ધારિત તારીખ પણ ૧૨/૧૦/૨૦૨૬ છે.
પગાર
પહેલાં પાંચ વર્ષ માટે માસિક રૂ. ૪૦,૮૦૦ના ફિક્સ પગારથી નિમણૂક થશે. પ્રોબેશન ૫ વર્ષનું છે. પાંચ વર્ષના અંતે સેવા સંતોષકારક જણાયેથી સાતમા પગાર પંચના રૂ. ૨૯,૨૦૦ થી રૂ. ૯૨,૩૦૦ (લેવલ-૫)ના પગારધોરણમાં નિયમિત નિમણૂક મેળવવા પાત્ર થશે.
પરીક્ષા
પસંદગી સ્પર્ધાત્મક પરીક્ષા દ્વારા થશે, જેમાં બે પેપર રહેશે:
- પેપર-૧ (નર્સિંગ): ૧૦૦ પ્રશ્ન, ૧૦૦ ગુણ, ૨ કલાક. ફન્ડામેન્ટલ ઓફ નર્સિંગ, મેડિકલ સર્જિકલ નર્સિંગ, મિડવાઇફરી અને પીડિયાટ્રિક નર્સિંગ, મેન્ટલ હેલ્થ અને સાયકિયાટ્રિક નર્સિંગ તથા કોમ્યુનિટી હેલ્થ નર્સિંગમાંથી ૨૦ ગુણના વિભાગ રહેશે.
- પેપર-૨ (ગુજરાતી ભાષા): ૧૦૦ પ્રશ્ન, ૧૦૦ ગુણ, ૨ કલાક. ભાષા ૩૦ ગુણ, વ્યાકરણ ૪૦ ગુણ અને સાહિત્ય ૩૦ ગુણ.
બંને પેપરમાં ઉત્તીર્ણ થવા માટે ૪૦ ટકા ગુણ જરૂરી છે. MCQ પદ્ધતિમાં ખોટા જવાબ પર ૧/૪ માર્ક નેગેટિવ માર્કિંગથી કપાશે. નર્સિંગનું પેપર ગુજરાતી કે અંગ્રેજીમાં આપી શકાશે, જ્યારે ગુજરાતી ભાષાનું પેપર ફક્ત ગુજરાતીમાં જ રહેશે.
પરીક્ષાની તારીખ અને પ્રવેશપત્ર અંગેની સૂચના મંડળની વેબસાઇટ gsssb.gujarat.gov.in પર મૂકવામાં આવશે.
જગ્યાઓની વહેંચણી
કુલ ૧૩૧ જગ્યાઓ પૈકી બિનઅનામત (સામાન્ય) ૪૬, આર્થિક રીતે નબળા વર્ગ (EWS) ૧૩, SEBC ૪૫, અનુસૂચિત જાતિ ૧૬ અને અનુસૂચિત જનજાતિ ૧૧ જગ્યા છે. મહિલાઓ માટે કુલ જગ્યાઓ પૈકી ૩૨ જગ્યા અનામત છે. દિવ્યાંગ ઉમેદવારો માટેની અનામત જગ્યાઓ ખાસ ભરતી ઝુંબેશ હેઠળ અલગથી જાહેરાત પ્રસિદ્ધ થશે.
ભરતી પ્રક્રિયાની તમામ સૂચનાઓ મંડળની વેબસાઇટ પર મૂકવામાં આવશે, તેથી ઉમેદવારો વેબસાઇટ સમયાંતરે જોતાં રહેવાની સલાહ આપેલ છે. કોઈ માર્ગદર્શનની જરૂર પડે તો મંડળની કચેરીના ફોન નંબર ૦૭૯-૨૩૨૫૮૯૧૬ પર સંપર્ક કરી શકાશે.
