GPSC: પુરવઠા નિગમમાં મેનેજર (MIS) વર્ગ-૧ અને વર્ગ-૨ માટે ૯ ઓક્ટોબરે રૂબરૂ Opt-Out પ્રક્રિયા યોજાશે
ગુજરાત રાજ્ય નાગરિક પુરવઠા નિગમમાં મેનેજર અને નાયબ મેનેજર (MIS) માટે ૯ ઓક્ટોબરે ગાંધીનગર ખાતે રૂબરૂ ઓપ્ટ-આઉટ પ્રક્રિયા યોજાશે.
ગુજરાત જાહેર સેવા આયોગે (GPSC) ગુજરાત રાજ્ય નાગરિક પુરવઠા નિગમ લિમિટેડ (GSCSCL) હસ્તકની મેનેજર (MIS) વર્ગ-૧ અને નાયબ મેનેજર (MIS) વર્ગ-૨ ભરતી માટે રૂબરૂ ઓપ્ટ-આઉટ (OPT-OUT) પ્રક્રિયાની જાહેરાત કરી છે. આ કાર્યવાહી ૯ ઓક્ટોબર ૨૦૨૬ના રોજ સવારે ૧૦:૦૦ વાગ્યે ગાંધીનગર ખાતે આયોગની કચેરીએ થશે.
આયોગની જાહેરાત ક્રમાંક ૧૦૩/૨૦૨૫-૨૬ (મેનેજર MIS, વર્ગ-૧) અને જાહેરાત ક્રમાંક ૧૦૪/૨૦૨૫-૨૬ (નાયબ મેનેજર MIS, વર્ગ-૨) બંનેની પ્રાથમિક પરીક્ષા અને ઇન્ટરવ્યુ સંયુક્ત રીતે લેવામાં આવ્યા હતા. બંને જાહેરાતોમાં સામાન્ય ઉમેદવારોની પસંદગી થવાની શક્યતા હોવાથી તેમજ જગ્યા ખાલી ન રહે અને અન્ય લાયક ઉમેદવારોને રોજગારીની તક મળે, તે માટે આયોગે રૂબરૂ ઓપ્ટ-આઉટ કરાવવાનો નિર્ણય કર્યો છે.
ઉમેદવારો માટે જરૂરી સૂચનાઓ
- સ્થળ અને સમય: ઓપ્ટ-આઉટની પ્રક્રિયા ૯ ઓક્ટોબર ૨૦૨૬ના રોજ સવારે ૧૦:૦૦ વાગ્યે ગુજરાત જાહેર સેવા આયોગ, સેક્ટર-૧૦-એ, છ-૩ સર્કલ પાસે, ‘છ’ રોડ, ગાંધીનગર ખાતે યોજાશે.
- કોણે હાજર રહેવું: આયોગે જાહેર કરેલી કામચલાઉ યાદી (The Provisional List of Candidates to be considered for OPT OUT Procedure) મુજબના ઉમેદવારોએ રૂબરૂ હાજર રહેવાનું રહેશે.
- ઓળખપત્ર અને દસ્તાવેજ: ઉમેદવારે ઓરિજિનલ ફોટો આઈડી પ્રૂફ સાથે રાખવું પડશે. આ સાથે આયોગ તરફથી મોકલાયેલો પત્ર અથવા ઇન્ટરવ્યુ કોલ લેટર પણ સાથે લાવવાનો રહેશે.
- મોબાઇલ પર મનાઈ: સમગ્ર પ્રક્રિયા દરમિયાન મોબાઇલ ફોન કે ઇલેક્ટ્રોનિક ગેજેટ્સનો ઉપયોગ કરવાની છૂટ નથી. જરૂર જણાય તો પરિવારજનો સાથે ટૂંકી વાતચીત કરવા માટે સક્ષમ અધિકારીની મંજૂરી મેળવવાની રહેશે.
ઓપ્ટ-આઉટ પ્રક્રિયાના નિયમો
એક કરતાં વધુ જાહેરાતમાં પસંદગી પામતા ઉમેદવારને જરૂર મુજબ ઓપ્ટ-આઉટનો વિકલ્પ અપાશે. ઉમેદવાર નિર્ણય લે તે પછી ડેટા એન્ટ્રી કરાશે અને નિયત ઓપ્ટ-આઉટ ફોર્મ (પરિશિષ્ટ-અ)માં પોતાના હસ્તાક્ષરથી વિગતો ભરી અધિકારી સમક્ષ જમા કરાવવાનું રહેશે. આખરી પસંદગી અંગે ઉમેદવારે પરિશિષ્ટ-બ મુજબની બાંહેધરી આપવાની રહેશે.
ઉમેદવાર જે સંવર્ગ કે જગ્યા માટે ઓપ્ટ-આઉટ કરશે, તે જગ્યા અંગે ભવિષ્યમાં કોઈ હક કે દાવો કરી શકશે નહીં. આથી ઉમેદવારે પૂરી વિચારણા કરીને અને પરિવારજનો સાથે ચર્ચા કરીને આવવાનું રહેશે.
જો કોઈ યોગ્ય કારણસર ઉમેદવાર પોતે રૂબરૂ હાજર રહી શકે તેમ ન હોય, તો ઓથોરિટી લેટર (પરિશિષ્ટ-ક) દ્વારા પ્રતિનિધિ મોકલવા માટે ઉમેદવારે વહેલામાં વહેલી તકે આયોગ સમક્ષ રૂબરૂ અથવા ઇ-મેઇલથી પૂર્વ મંજૂરી મેળવવાની રહેશે.
રૂબરૂ ઓપ્ટ-આઉટ અને પસંદગીની કાર્યવાહી પૂરી થયા પછી આયોગ આખરી પરિણામ જાહેર કરશે. વિગતવાર પરિપત્ર અને ફોર્મ GPSCની સત્તાવાર જાહેરાત પરથી જોઈ શકાશે.
