GPSC: પુરવઠા નિગમમાં મેનેજર અને નાયબ મેનેજર (MIS) માટે ૯ ઓક્ટોબરે રૂબરૂ Opt-Out પ્રક્રિયા યોજાશે
GSCSCL હસ્તક મેનેજર અને નાયબ મેનેજર (MIS) ભરતી માટે ૯ ઓક્ટોબરે ગાંધીનગર GPSC કચેરી ખાતે રૂબરૂ ઓપ્ટ-આઉટ પ્રક્રિયા યોજાશે.
ગુજરાત જાહેર સેવા આયોગે (GPSC) ગુજરાત રાજ્ય નાગરિક પુરવઠા નિગમ લિમિટેડ (GSCSCL) હસ્તકની મેનેજર (MIS) વર્ગ-૧ અને નાયબ મેનેજર (MIS) વર્ગ-૨ ભરતી માટે રૂબરૂ ઓપ્ટ-આઉટ (OPT-OUT) પ્રક્રિયાની જાહેરાત કરી છે. આ પ્રક્રિયા ૯ ઓક્ટોબર ૨૦૨૬ના રોજ સવારે ૧૦ વાગ્યે ગાંધીનગર ખાતે આયોગની કચેરીએ યોજાશે.
આયોગની જાહેરાત ક્રમાંક ૧૦૩/૨૦૨૫-૨૬ (મેનેજર MIS, વર્ગ-૧) અને જાહેરાત ક્રમાંક ૧૦૪/૨૦૨૫-૨૬ (નાયબ મેનેજર MIS, વર્ગ-૨) બંનેની પ્રાથમિક પરીક્ષા અને ઇન્ટરવ્યુ સંયુક્ત રીતે લેવામાં આવ્યા હતા. બંને જાહેરાતોમાં કોમન ઉમેદવારની પસંદગી થવાની શક્યતા હોવાથી અને અન્ય લાયક ઉમેદવારોને તક મળે તે માટે આયોગે રૂબરૂમાં ઓપ્ટ-આઉટ કરાવવાનો નિર્ણય કર્યો છે.
ઉમેદવારોએ આ બાબતો ધ્યાનમાં રાખવી
- તારીખ અને સમય: ઓપ્ટ-આઉટની કાર્યવાહી ૯ ઓક્ટોબર ૨૦૨૬ના રોજ સવારે ૧૦:૦૦ વાગ્યે આયોગની કચેરી, સેક્ટર-૧૦-એ, છ-૩ સર્કલ પાસે, ‘છ’ રોડ, ગાંધીનગર ખાતે થશે.
- કોણે હાજર રહેવું: આયોગે પ્રસિદ્ધ કરેલી ‘The Provisional List of Candidates to be considered for OPT OUT Procedure’ યાદી મુજબના ઉમેદવારોએ રૂબરૂ હાજર રહેવાનું રહેશે.
- ઓળખપત્ર અને કોલ લેટર: ઉમેદવારે અસલ ફોટો ઓળખપત્ર (Original Photo ID Proof) તેમજ આયોગ તરફથી મોકલાયેલો પત્ર અથવા ઇન્ટરવ્યુ કોલ લેટર સાથે રાખવાનો રહેશે.
- મોબાઇલ પર પ્રતિબંધ: પ્રક્રિયા દરમિયાન મોબાઇલ ફોન કે ઇલેક્ટ્રોનિક ગેજેટ્સનો ઉપયોગ કરી શકાશે નહીં. પરિવાર સાથે ટૂંકી વાતચીત માટે સક્ષમ અધિકારીની મંજૂરી બાદ જ મર્યાદિત સમય માટે ફોન વાપરવા દેવાશે.
ઓપ્ટ-આઉટ પ્રક્રિયા કેવી રીતે થશે?
એક કરતાં વધુ જાહેરાતમાં પસંદગી પામતા ઉમેદવારને ઓપ્ટ-આઉટનો વિકલ્પ અપાશે. ઉમેદવાર નિર્ણય કરે તે પછી ડેટા એન્ટ્રી કરાશે અને નિયત ફોર્મ (પરિશિષ્ટ-અ)માં સહી સાથે વિગતો ભરી અધિકારીને જમા કરાવવાની રહેશે. ઉમેદવારે આપેલ આખરી પસંદગી અંગે પરિશિષ્ટ-બ મુજબની બાંહેધરી પણ આપવી પડશે.
જે જગ્યા કે ભરતીમાંથી ઉમેદવાર ઓપ્ટ-આઉટ કરશે, તે અંગે ભવિષ્યમાં કોઈ હક કે દાવો કરી શકાશે નહીં. આથી આયોગે ઉમેદવારોને પૂરી વિચારણા કરીને અને જરૂર જણાયે પરિવારજનો સાથે ચર્ચા કરીને આવવા જણાવ્યું છે.
જો કોઈ યોગ્ય કારણસર ઉમેદવાર પોતે રૂબરૂ આવી શકે તેમ ન હોય, તો નિયત ઓથોરિટી લેટર (પરિશિષ્ટ-ક) દ્વારા પ્રતિનિધિ મોકલવા માટે અગાઉથી આયોગ સમક્ષ રૂબરૂ કે ઇ-મેઇલથી પૂર્વ મંજૂરી મેળવવાની રહેશે.
રૂબરૂ ઓપ્ટ-આઉટ અને પસંદગીની કાર્યવાહી પૂરી થયા બાદ આયોગ આખરી પરિણામ જાહેર કરશે. વિગતવાર માહિતી અને ફોર્મના નમૂના માટે સત્તાવાર જાહેરાત જોઈ શકાશે.
