CBSE ધોરણ 10: પ્રાઇવેટ વિદ્યાર્થીઓ માટે પરીક્ષા ફોર્મ ભરવાનું શરૂ, છેલ્લી તારીખ 23 ઓક્ટોબર

સેન્ટ્રલ બોર્ડ ઓફ સેકન્ડરી એજ્યુકેશન (CBSE) દ્વારા વર્ષ 2026-2027ની ધોરણ 10ની મુખ્ય પરીક્ષા સાથે લેવાનાર પ્રાઇવેટ વિદ્યાર્થીઓની પરીક્ષા માટે ઓનલાઇન ફોર્મ ભરવાની પ્રક્રિયા 8 ઓક્ટોબર 2026થી શરૂ થઈ ગઈ છે. બોર્ડે 7 ઓક્ટોબર 2026ના રોજ આ અંગે વિગતવાર નોટિફિકેશન બહાર પાડ્યું છે.

વિદ્યાર્થીઓ સીબીએસઇની સત્તાવાર વેબસાઇટ પર ‘વ્યક્તિગત પરીક્ષાર્થી’ લિંક મારફતે અરજી કરી શકશે. બોર્ડે સ્પષ્ટ કર્યું છે કે અરજી અને ફી માત્ર ઓનલાઇન જ સ્વીકારવામાં આવશે, કોઈ ઓફલાઇન ફોર્મ કે ફી સ્વીકારાશે નહીં.

કોણ અરજી કરી શકે છે?

બોર્ડે પ્રાઇવેટ કેટેગરીમાં નીચે મુજબના વિદ્યાર્થીઓને ફોર્મ ભરવા પાત્ર ગણ્યા છે:

• એસેન્શિયલ રિપીટ: વર્ષ 2025-26ના એવા વિદ્યાર્થીઓ જેમના 2026ની પરીક્ષાના પરિણામમાં 'Essential Repeat' જાહેર થયું હોય.
• જૂના વિદ્યાર્થીઓ: વર્ષ 2021, 2022, 2023, 2024, 2025 અને 2026માં નાપાસ (Fail) અથવા Essential Repeat જાહેર થયેલા વિદ્યાર્થીઓ.
• કમ્પાર્ટમેન્ટ: વર્ષ 2025-26ના એવા વિદ્યાર્થીઓ જેમને 2026ની મુખ્ય કે પૂરક પરીક્ષામાં કમ્પાર્ટમેન્ટ આવ્યું હોય (સેકન્ડ ચાન્સ કમ્પાર્ટમેન્ટ).
• ઇમ્પ્રુવમેન્ટ: વર્ષ 2026ની પરીક્ષા પાસ કરી હોય અને એક કે વધુ વિષયોમાં પરિણામ સુધારવા માગતા હોય.
• મેડિકલ કારણો: નિયમિત અભ્યાસ પૂરો કર્યો હોય અને રોલ નંબર મળ્યો હોય પણ બીમારીના કારણે 2026ની પરીક્ષા આપી ન શક્યા હોય તેવા વિદ્યાર્થીઓ (હાજરીની ઘટ સિવાય).

ફી અને ફોર્મ ભરવાની તારીખો

સીબીએસઇ દ્વારા જાહેર કરવામાં આવેલું ફી અને તારીખોનું શિડ્યુલ આ મુજબ છે:

• સામાન્ય ફી સાથે ફોર્મ ભરવાની તારીખ: 8 ઓક્ટોબર 2026થી 23 ઓક્ટોબર 2026
• પરીક્ષા ફી (ભારતના વિદ્યાર્થીઓ માટે): વિષય દીઠ ₹320 (વધારાના વિષય માટે પણ વિષય દીઠ ₹320)
• લેટ ફી સાથે ફોર્મ ભરવાની તારીખ: 24 ઓક્ટોબર 2026થી 30 ઓક્ટોબર 2026
• લેટ ફી: સામાન્ય ફી ઉપરાંત વિદ્યાર્થી દીઠ ₹2,000 વધારાની લેટ ફી ચૂકવવી પડશે.

નેપાળના વિદ્યાર્થીઓ માટે વિષય દીઠ ₹1,100 અને અન્ય દેશોના વિદ્યાર્થીઓ માટે વિષય દીઠ ₹2,200 ફી નક્કી કરાઈ છે. ફી માત્ર નેટ બેંકિંગ, યુપીઆઈ (UPI), ડેબિટ કાર્ડ અથવા ક્રેડિટ કાર્ડથી જ ઓનલાઇન ભરી શકાશે.

ફોર્મ ભરતી વખતે ધ્યાનમાં રાખવા જેવી બાબતો

• વિદ્યાર્થી એક જ ફોર્મ ભરી શકશે. એકવાર ફોર્મ ભર્યા પછી બીજી કેટેગરીમાં અરજી કરવાની મંજૂરી મળશે નહીં.
• ઓટીપી વેરિફિકેશન માટે ચાલુ અને સાચો ઇમેઇલ આઇડી આપવો ફરજિયાત છે.
• વર્ષ 2026ની પરીક્ષા આપી ચૂકેલા વિદ્યાર્થીઓની વિગતો સિસ્ટમમાં આપોઆપ આવી જશે, જ્યારે 2025 કે તે પહેલાંના વિદ્યાર્થીઓએ રોલ નંબર, સ્કૂલ નંબર અને સેન્ટર નંબર જાતે ભરવાના રહેશે.
• વિદ્યાર્થીનો તાજેતરનો (છેલ્લા 6 મહિનામાં લીધેલો) પાસપોર્ટ સાઇઝનો ફોટો અને સહી 40 KB સુધીની JPG સાઇઝમાં અપલોડ કરવાના રહેશે.
• ફોર્મ ભર્યા પછી તેની હાર્ડ કોપી સીબીએસઇ ઓફિસે મોકલવાની જરૂર નથી. વિદ્યાર્થીઓએ પોતાના રેકોર્ડ માટે પ્રિન્ટ સાચવી રાખવી.
• પરીક્ષા કેન્દ્ર વિદ્યાર્થીએ ફોર્મમાં પસંદ કરેલા શહેર મુજબ ફાળવવામાં આવશે અને એકવાર નક્કી થયેલું કેન્દ્ર બદલી શકાશે નહીં.

દિલ્હી બહારના સેન્ટરો પર પરીક્ષા આપનાર વિદ્યાર્થીઓ સીબીએસઇની વેબસાઇટ પરથી એડમિટ કાર્ડ ડાઉનલોડ કરી શકશે, જ્યારે ઓરિજિનલ માર્કશીટ-કમ-સર્ટિફિકેટ સંબંધિત રિજનલ ઓફિસ દ્વારા વિદ્યાર્થીના સરનામે સ્પીડ પોસ્ટથી મોકલવામાં આવશે.

વધુ માહિતી અને નિયમો જાણવા માટે સીબીએસઇનું સત્તાવાર જાહેરનામું જોઈ શકાશે. પૂછપરછ માટે બોર્ડે હેલ્પલાઇન નંબર 1800-11-8002 જાહેર કર્યો છે, જેના પર કામકાજના દિવસોમાં સવારે 9:30થી સાંજે 5:30 વાગ્યા સુધી સંપર્ક કરી શકાય છે.