તરણેતર મેળાના છેલ્લા દિવસે ત્રિનેત્રેશ્વર મહાદેવને ધજા ચડાવાઈ
પોલીસ પરિવાર અને જિલ્લા વહીવટી તંત્રના સંયુક્ત ઉપક્રમે થયેલી ધજા યાત્રામાં રેન્જ આઈ.જી. નિર્લિપ્ત રાય અને એસ.પી. પ્રેમસુખ ડેલું હાજર રહ્યા. મેળા દરમિયાન કાયદો વ્યવસ્થા સુચારુ રહી.
વિશ્વપ્રસિદ્ધ તરણેતર લોકમેળાના અંતિમ દિવસે સુરેન્દ્રનગર જિલ્લા પોલીસ પરિવાર અને જિલ્લા વહીવટી તંત્રના સંયુક્ત ઉપક્રમે શ્રી ત્રિનેત્રેશ્વર મહાદેવના મંદિરે ભક્તિભાવપૂર્વક ધજા ચડાવવામાં આવી. આ પ્રસંગે રેન્જ આઈ.જી. નિર્લિપ્ત રાય, પોલીસ અધિક્ષક પ્રેમસુખ ડેલું, મદદનીશ પોલીસ અધિક્ષક વૈદિકા બિહાની અને નાયબ પોલીસ અધિક્ષક વિશાલ રબારી સહિતના ઉચ્ચ અધિકારીઓ ખાસ હાજર રહ્યા હતા.
તરણેતર આઉટ પોસ્ટથી ધજા યાત્રાનું પ્રસ્થાન થયું હતું. યાત્રામાં મોટી સંખ્યામાં શ્રદ્ધાળુઓ અને સ્થાનિક લોકો જોડાયા હતા. રૂટ પર રાસમંડળીઓએ પરંપરાગત રાસની રમઝટ બોલાવી. આંટાડી પાઘડી અને રંગબેરંગી કેડિયું પહેરેલા યુવાનો તથા મેળાની ખાસ ઓળખ સમી મોરલાવાળી છત્રીઓ સાથે જોડાયેલા લોકો આકર્ષણનું કેન્દ્ર રહ્યા.
યાત્રા ત્રિનેત્રેશ્વર મહાદેવ મંદિરે પહોંચતા પોલીસ જવાનોએ પુષ્પવર્ષા કરીને સ્વાગત કર્યું. મુખ્ય પૂજારીએ શાસ્ત્રોક્ત વિધિથી ધજાનું પૂજન કરાવ્યું અને મંદિરના શિખર પર ધ્વજારોહણ થયું. આ ક્ષણે મંદિર પરિસર "હર હર મહાદેવ"ના નાદથી ગુંજી ઊઠ્યું. ધ્વજારોહણ બાદ રાસ-ગરબામાં રાસમંડળીઓ સાથે પોલીસ જવાનો પણ જોડાયા હતા.
મેળામાં કાયદો વ્યવસ્થા સુચારુ રહી
રેન્જ આઈ.જી. નિર્લિપ્ત રાયે જણાવ્યું હતું કે મેળાના સમાપન અવસરે પોલીસ પરિવાર અને રેન્જમાંથી આવેલા અધિકારી-કર્મચારીઓએ ભગવાન ત્રિનેત્રેશ્વરના ચરણોમાં ધ્વજ અર્પણ કરી, તેમના આશીર્વાદ મેળવીને સુરક્ષા બંદોબસ્તની સફળ પૂર્ણાહુતિ કરી છે.
તા. ૧૪થી શરૂ થયેલા મેળામાં પશુ પ્રતિયોગિતા અને લાડવા ખાવાની હરીફાઈ જેવી ગ્રામીણ સ્પર્ધાઓનો સહેલાણીઓએ ઉત્સાહભેર આનંદ માણ્યો હતો. આખા મેળા દરમિયાન કાયદો અને વ્યવસ્થાની પરિસ્થિતિ સુચારુ જળવાઈ રહી અને કોઈ વિપરીત બનાવ નથી બન્યો.
માહિતી બ્યુરો, સુરેન્દ્રનગરના સત્તાવાર પ્રેસ નોટિસ પર આધારિત.
