વંદે માતરમ દરમિયાન બેસી જવા બદલ ઇમરાનભાઈ ખેડાવાલાનો પ્રશ્ન વિશેષાધિકાર સમિતિને

ગાંધીનગર: વિધાનસભાના સત્રના પહેલા દિવસે વંદે માતરમનું ગાન ચાલુ હતુ ત્યાં જ પોતાના સ્થાને બેસી જવા બદલ હવે કોંગ્રેસના ધારાસભ્ય ઇમરાનભાઈ ખેડાવાલાનો પ્રશ્ન વિશેષાધિકાર સમિતિ પાસે ગયો છે. ગુજરાત વિધાનસભા સચિવાલયે ૨૪ સપ્ટેમ્બર, ૨૦૨૬ના રોજ આ બાબતનું પત્રક ભાગ-૨ બહાર પાડ્યું છે.

પત્રક મુજબ, વિધાનસભાના સત્રના પહેલા દિવસે તા. ૯/૯/૨૦૨૬ના રોજ અધ્યક્ષસ્થાનેથી સૌને વંદે માતરમ ગાન માટે પોતાના સ્થાને ઉભા થવાની સૂચના આપેલી હતી. જમાલપુર-ખાડીયા (૫૨)ના ધારાસભ્ય ઇમરાનભાઈ ખેડાવાલા સહિત હાજર તમામ સભ્યો ઉભા થયા હતા. વંદે માતરમના બે અંતરાના ગાન બાદ ગાન હજુ ચાલુ જ હતુ ત્યાં ખેડાવાલા પોતાના સ્થાન ઉપર બેસી ગયા હતા.

આ બાબતે તા. ૧૦/૯/૨૦૨૬ના રોજ નાયબ મુખ્યમંત્રી હર્ષભાઈ સંઘવીએ પોઇન્ટ ઓફ ઓર્ડર ઉઠાવી હતી. તેમણે કહ્યું હતું કે ખેડાવાલાએ વંદે માતરમનું ગાન ચાલુ હતુ ત્યાં બેસી જઈને ગાનનું અને સભાગૃહનું અપમાન કર્યું છે, અધ્યક્ષશ્રીના આદેશનો અનાદર કરેલ છે અને ગૃહની ગરીમાને ઠેસ પહોંચ્યો છે. તેમણે ખેડાવાલા સામે વિશેષાધિકાર ભંગ કે બીજા ઉપયાત્મક પગલાં લેવાની પરખાસ કરી હતી.

પોઇન્ટ ઓફ ઓર્ડરના સમર્થનમાં સંસદીય બાબતોના મંત્રી ઋષિકેશભાઈ પટેલ, મંત્રી જીતુભાઈ વાઘાણી, મંત્રી અર્જુનભાઈ મોઢવાડિયા અને સભ્ય જગદીશભાઈ વિશ્વકર્માએ મંતવ્યો રજૂ કર્યા હતા. કોંગ્રેસ પક્ષના અમીતભાઈ ચાવડા, શૈલેશભાઈ પરમાર અને જિગ્નેશ મેહતાએ પણ પોતાના મંતવ્યો મૂક્યા હતા.

પત્રકમાં નોંધવામાં આવ્યું છે કે પોઇન્ટ ઓફ ઓર્ડર ઉઠાવાયો ત્યારે ખેડાવાલા સભાગૃહમાં હાજર ન હતા. પણ તેમણે મીડિયા સમક્ષ વંદે માતરમ દરમિયાન ગૃહમાં બેસી જવા સંબંધે બાઇટ આપેલ હતી. ખેડાવાલાએ સંસદીય શિષ્ટાચાર અને ગૃહમાં પરિષદના પ્રસ્થાપિત ધોરણોનો ભંગ કર્યો હોવાનું અને ગૃહનું અપમાન કર્યું હોવાનું પ્રથમદર્શી જણાતાં, તા. ૧૧/૯/૨૦૨૬ના રોજની વિધાનસભાગૃહની બેઠકમાં અધ્યક્ષશ્રીએ જાહેર કરેલ કે આ કૃત્યની તપાસ ગુજરાત વિધાનસભાના નિયમોના નિયમ-૨૫૩ હેઠળ વિશેષાધિકાર સમિતિને સોંપવામાં આવશે.

અધ્યક્ષશ્રીએ કહેલ કે નાયબ મુખ્યમંત્રીના પોઇન્ટ ઓફ ઓર્ડર પર તેમનો નિર્ણય હવે પછી જાહેર કરશે. વંદે માતરમ ગાનને ૧૯૭૧ના કાયદામાં થયેલા સુધારા દ્વારા જન ગણ મન સમક્ષ ભારતના રાષ્ટ્રગાનનું સ્થાન અપાયું છે, એવું પણ પત્રકમાં જણાવાયું છે.

અહીં પત્રક ભાગ-૨ વાંચો