બરડામાં સિંહોના વસવાટ માટે પોરબંદર વન વિભાગનું પુનર્ગઠન: ૭ રેન્જ અને નવી બીટની રચના થઈ

બરડા ડુંગરમાં એશિયાઈ સિંહોના વસવાટ અને વહીવટી વ્યવસ્થાને વધુ મજબૂત કરવા માટે રાજ્ય સરકારે પોરબંદર વન વિભાગનું મોટું પુનર્ગઠન કર્યું છે. ગાંધીનગરમાં ૨૯ સપ્ટેમ્બર ૨૦૨૬ના રોજ મુખ્યમંત્રી ભૂપેન્દ્ર પટેલની અધ્યક્ષતામાં આ નિર્ણય લેવાયો છે. ૧૪૩ વર્ષ પછી બરડાના જંગલમાં સિંહો પાછા ફર્યા હોવાથી વન્યજીવ વ્યવસ્થાપન અને જંગલ રક્ષણ માટે નવી રેન્જ અને બીટની વ્યવસ્થા અમલમાં મૂકવામાં આવી છે.

વન અને પર્યાવરણ મંત્રી અર્જુનભાઈ મોઢવાડિયા અને રાજ્ય મંત્રી પ્રવીણભાઈ માળીના માર્ગદર્શન હેઠળ વન વિભાગે આ અંગેનો સત્તાવાર ઠરાવ કર્યો છે, જે તાત્કાલિક અસરથી લાગુ થઈ ગયો છે.

પોરબંદર રેન્જ: ૮૦ ગામ અને ૬,૮૪૦ હેક્ટર વિસ્તાર

નવા માળખા મુજબ પોરબંદર રેન્જ હેઠળ ૬,૮૪૦.૮૪ હેક્ટર જંગલ વિસ્તાર અને કુલ ૮૦ ગામ આવરી લેવાયા છે. આ રેન્જને જુદી જુદી બીટમાં વહેંચવામાં આવી છે, જેમાં પોરબંદર સિટી, ગોસાબારા, મોકર, વિસાવદર (વિસાવડા), કાંતેલા, માધવપુર અને સાતિયા બીટનો સમાવેશ થાય છે. ચોક્કસ વિસ્તારો અને ગામો બીટ મુજબ સોંપાતાં ફિલ્ડ સ્ટાફની જવાબદારી સ્પષ્ટ થશે.

રાણાવાવ રેન્જ: ૧૩,૦૫૧ હેક્ટર વિસ્તારનો સમાવેશ

રાણાવાવ રેન્જ હેઠળ ૧૩,૦૫૧.૨૫ હેક્ટર વિસ્તાર અને ૨૭ ગામ સામેલ કરાયાં છે. આ વિસ્તારને ગોદાણા, બિલેશ્વર, સાવદ્રિવાદર અને રાણાવાવ જેવી બીટમાં વહેંચવામાં આવ્યો છે. આ વ્યવસ્થાથી બરડા વિસ્તારમાં વન સંરક્ષણ અને પેટ્રોલીંગનું કામ સ્થાનિક સ્તરે વધુ સચોટ રીતે થઈ શકશે.

ભાણવડ રેન્જમાં ૩૦૫ હેક્ટર ઉમેરાયા

જામનગર વન વિભાગ હેઠળની કલ્યાણપુર-ભાટિયા રેન્જના ૩૦૫.૯૪ હેક્ટર જંગલ વિસ્તારને પોરબંદર વન વિભાગની ભાણવડ રેન્જમાં ભેળવી દેવામાં આવ્યો છે. દેવભૂમિ દ્વારકા જિલ્લાના ભાણવડ તાલુકાના ચાર ગામો—કંદરડા જોગણા, સજડીયાળા, જૂના અને જંબુસરનો વિસ્તાર હવે પોરબંદર વન વિભાગના વહીવટ નીચે આવશે. આ કારણે આજુબાજુ જોડાયેલા જંગલ વિસ્તારનું સંચાલન એક જ તંત્ર હેઠળ રહેશે.

કુતિયાણા અને સામાજિક વનીકરણ રેન્જ પણ પોરબંદરમાં

કુતિયાણા રેન્જ, પોરબંદર સામાજિક વનીકરણ રેન્જ અને રાણાવાવ સામાજિક વનીકરણ રેન્જને પણ પોરબંદર વન વિભાગ હેઠળ લાવવામાં આવી છે. આ ફેરફાર સાથે વાહનો, હથિયારો, વાયરલેસ સેટ, વોકી-ટોકી અને દફતર સહિતના તમામ સાધનો નિયમ મુજબ ટ્રાન્સફર થશે.

બે મદદનીશ વન સંરક્ષક સંભાળશે કામગીરી

પુનર્ગઠન પછી પોરબંદર વન વિભાગમાં કુલ સાત રેન્જ થઈ હોવાથી બે મદદનીશ વન સંરક્ષક (ACF) મુકાયા છે:

• મદદનીશ વન સંરક્ષક-૧: પોરબંદર રેન્જ, પોરબંદર સામાજિક વનીકરણ રેન્જ અને રાણાવાવ સામાજિક વનીકરણ રેન્જ સંભાળશે.
• મદદનીશ વન સંરક્ષક-૨: રાણાવાવ રેન્જ, ભાણવડ રેન્જ, કુતિયાણા રેન્જ અને મોબાઇલ સ્ક્વોડ રેન્જની કામગીરી જોશે.

આ માટે કેવડિયા ખાતે મંજૂર થયેલી બે જગ્યાઓમાંથી ખાલી પડેલી મદદનીશ વન સંરક્ષકની એક જગ્યા પોરબંદર ખાતે બદલવામાં આવી છે.

જૂનાગઢ વન્યજીવ વર્તુળ હેઠળ જ કામ ચાલુ રહેશે

આ તમામ ફેરફારો છતાં પોરબંદર વન વિભાગ જૂનાગઢ વન્યજીવ વર્તુળ હેઠળ જ કામ કરશે. પોરબંદર વન વિભાગના નાયબ વન સંરક્ષક (DCF) હેઠળ આ બંને મદદનીશ વન સંરક્ષક કામગીરી સંભાળશે. પોરબંદર વન વિભાગના મોબાઇલ સ્ક્વોડની જવાબદારી રેન્જ ફોરેસ્ટ ઓફિસરને સોંપવામાં આવી છે જેથી ફિલ્ડમાં તાત્કાલિક પગલાં લઈ શકાય.

સત્તાવાર જાહેરાત: મુખ્યમંત્રી કાર્યાલય, ગુજરાત