GSSSB: વિવિધ ટેકનિકલ સંવર્ગોની પ્રોવિઝનલ આન્સર કી જાહેર, ૧૩ ઓક્ટોબર સુધી ઓનલાઇન વાંધા રજૂ કરી શકાશે

ગુજરાત ગૌણ સેવા પસંદગી મંડળે વિવિધ ટેકનિકલ સંવર્ગોની સીધી ભરતી અને દિવ્યાંગ ઉમેદવારો માટેની ખાસ ભરતી ઝુંબેશ હેઠળ યોજાયેલી કમ્પ્યુટર આધારિત પરીક્ષા (CBRT)ની પ્રોવિઝનલ આન્સર કી અને રિસ્પોન્સ શીટ ઓનલાઇન જાહેર કરી દીધી છે. આ પરીક્ષાઓ ૩ ઓક્ટોબરથી ૫ ઓક્ટોબર ૨૦૨૬ દરમિયાન લેવામાં આવી હતી. જે ઉમેદવારો આ પરીક્ષામાં બેઠા હતા તેઓ પોતાનું પ્રશ્નપત્ર, આપેલા જવાબો અને પ્રોવિઝનલ આન્સર કી લિંક પર જઈને જોઈ શકશે.

પસંદગી મંડળની સૂચના મુજબ, પ્રોવિઝનલ આન્સર કી સામે કોઈ વાંધો કે સૂચન હોય તો ઉમેદવારોએ જરૂરી આધાર-પુરાવા સાથે ઓનલાઇન રજૂઆત કરવાની રહેશે. વાંધા રજૂ કરવા માટે સંવર્ગ મુજબ ચોક્કસ મુદત નક્કી કરવામાં આવી છે.

કઈ પરીક્ષાના વાંધા ક્યાં સુધી સ્વીકારાશે?

મંડળે જાહેર કરેલા સમયપત્રક મુજબ અલગ-અલગ જાહેરાતો માટે વાંધા રજૂ કરવાની તારીખો નીચે મુજબ છે:

૬ ઓક્ટોબર બપોરે ૩:૦૦ વાગ્યાથી ૧૨ ઓક્ટોબર ૨૦૨૬ રાત્રે ૧૧:૫૫ વાગ્યા સુધી:

• રેડીયોથેરાપી ટેકનીશીયન (સીધી ભરતી, જા.ક્ર. ૪૨૬/૨૦૨૫૨૬) – પરીક્ષા તારીખ: ૩ ઓક્ટોબર ૨૦૨૬
• એક્ષ-રે ટેકનીશીયન (SRD, જા.ક્ર. ૪૩૨/૨૦૨૬૨૭) – પરીક્ષા તારીખ: ૩ ઓક્ટોબર ૨૦૨૬
• જુનિયર ઉદ્યોગ નિરીક્ષક (SRD, જા.ક્ર. ૪૪૨/૨૦૨૬૨૭) – પરીક્ષા તારીખ: ૩ ઓક્ટોબર ૨૦૨૬
• સિનિયર ઉદ્યોગ નિરીક્ષક (SRD, જા.ક્ર. ૪૫૧/૨૦૨૬૨૭) – પરીક્ષા તારીખ: ૩ ઓક્ટોબર ૨૦૨૬

૭ ઓક્ટોબર બપોરે ૩:૦૦ વાગ્યાથી ૧૩ ઓક્ટોબર ૨૦૨૬ રાત્રે ૧૧:૫૫ વાગ્યા સુધી:

• અધિક મદદનીશ ઇજનેર (સિવિલ) (સીધી ભરતી, જા.ક્ર. ૩૦૩/૨૦૨૫૨૬) – પરીક્ષા તારીખ: ૪ ઓક્ટોબર ૨૦૨૬
• જુનિયર ઉદ્યોગ નિરીક્ષક (સીધી ભરતી, જા.ક્ર. ૪૨૩/૨૦૨૬૨૭) – પરીક્ષા તારીખ: ૪ ઓક્ટોબર ૨૦૨૬
• એગ્રીકલ્ચર ઓવરશીયર (સીધી ભરતી, જા.ક્ર. ૪૩૫/૨૦૨૬૨૭) – પરીક્ષા તારીખ: ૫ ઓક્ટોબર ૨૦૨૬

આધાર-પુરાવા અંગે મંડળની સ્પષ્ટ ચેતવણી

મંડળે જણાવ્યું છે કે વાંધા-સૂચનો માટે ફક્ત અધિકૃત, પ્રમાણિત અને વિશ્વસનીય દસ્તાવેજો જ પુરાવા તરીકે માન્ય રહેશે. આધાર-પુરાવા વગરના વાંધા ધ્યાને લેવાશે નહીં.

તે સિવાય, ChatGPT, Gemini, Grok સહિતના AI સાધનો, Google Search કે બીજી કોઈ વેબસાઇટ પરથી મેળવેલી માહિતી કે લિંક્સને અધિકૃત પુરાવા તરીકે ગણવામાં આવશે નહીં. પુરાવા તરીકે પુસ્તકનું નામ, પાના નંબર, લેખકનું નામ, પ્રકાશકનું નામ-સરનામું અને પ્રકાશનનું વર્ષ દર્શાવવું પડશે. પુરાવાની ફાઇલ વધુમાં વધુ 400 KB સુધીની સ્પષ્ટ PDF કે JPG/JPEG ફોર્મેટમાં અપલોડ કરવાની રહેશે, અને ઉમેદવાર વધુમાં વધુ ત્રણ ડોક્યુમેન્ટ અપલોડ કરી શકશે.

ઓનલાઇન વાંધા કેવી રીતે નોંધાવવા?

• પરીક્ષામાં હાજર રહેલા ઉમેદવારોએ પસંદગી મંડળની પોર્ટલ લિંક પર જઈને જાહેરાત ક્રમાંક, કન્ફર્મેશન નંબર, જન્મ તારીખ અને ઇમેજ ટેક્સ્ટ નાખીને લોગિન કરવાનું રહેશે.
• ત્યારબાદ Candidate Response પર ક્લિક કરીને ‘Click here to generate it’ પર જવાથી પ્રશ્નપત્ર અને રિસ્પોન્સ શીટ ખુલશે, જેને PDF તરીકે સેવ કે પ્રિન્ટ કરી શકાશે.
• વાંધો નોંધાવવા માટે Objection Form ટેબ પર જઈને સરવાળાના ચિહ્ન (+) પર ક્લિક કરવાનું રહેશે.
• ઉમેદવારે પોતાની રિસ્પોન્સ શીટમાં આપેલા Question ID અને Answer ID મુજબ વિગતો ભરીને વાંધો નોંધાવવાનો રહેશે. એક કરતાં વધુ સાચા જવાબ હોવાનો વાંધો હોય તો Type of Objection માં યોગ્ય વિકલ્પ પસંદ કરી શકાશે.
• વાંધા માત્ર ઓનલાઇન જ સ્વીકારાશે, અન્ય કોઈ માધ્યમથી મોકલેલા વાંધા ધ્યાને લેવાશે નહીં.

આ અંગેની વિગતવાર માહિતી અને સૂચનાઓ મંડળના સત્તાવાર પરિપત્ર પર જોઈ શકાશે.