GPSC: સામાન્ય વહીવટ વિભાગમાં રિસર્ચ ઓફિસર વર્ગ-૨ની પ્રોવિઝનલ આન્સર કી જાહેર, ૧૩ ઓક્ટોબર સુધી વાંધા મંગાવાયા

ગુજરાત જાહેર સેવા આયોગ (GPSC) દ્વારા સામાન્ય વહીવટ વિભાગ હેઠળ રિસર્ચ ઓફિસર વર્ગ-૨ની પ્રાથમિક પરીક્ષાની પ્રોવિઝનલ આન્સર કી જાહેર કરવામાં આવી છે. આ પરીક્ષા ૨૯ સપ્ટેમ્બર ૨૦૨૬ના રોજ લેવાઈ હતી. જે ઉમેદવારોએ આ પરીક્ષા આપી હોય તેઓ પોતાના જવાબો ચકાસી શકે છે અને કોઈ પ્રશ્ન કે ઉત્તરમાં વાંધો હોય તો ઓનલાઇન રજૂઆત કરી શકે છે.

આ ભરતી જાહેરાત ક્રમાંક ૨૩/૨૦૨૬-૨૭ હેઠળ સંબંધિત વિષય (Concerned Subject) ના પ્રશ્ન ક્રમાંક ૧ થી ૨૦૦ માટેની આન્સર કી માસ્ટર પ્રશ્નપત્ર સાથે પ્રસિદ્ધ કરવામાં આવી છે.

વાંધા રજૂ કરવાની પ્રક્રિયા અને નિયમો

GPSC ના નોટિફિકેશન મુજબ ઓનલાઇન વાંધા રજૂ કરવાની લિંક ૮ ઓક્ટોબર ૨૦૨૬ના રોજ સવારે ૧૧:૦૦ વાગ્યાથી શરૂ થઈ ગઈ છે. ઉમેદવારો ૧૩ ઓક્ટોબર ૨૦૨૬ના રોજ સાંજે ૦૪:૦૦ વાગ્યા સુધીમાં પોતાના વાંધા ઓનલાઇન મોકલી શકશે.

વાંધા રજૂ કરવા માટે આ બાબતો ધ્યાને રાખવાની રહેશે:

• દરેક વાંધા દીઠ રૂ. ૧૦૦ ફી ભરવાની રહેશે. ફી ભર્યા વગર સબમિટ કરેલો વાંધો ધ્યાને લેવાશે નહીં.
• વાંધા ફક્ત GPSC ની અધિકૃત ઓનલાઇન વાંધા અરજી સિસ્ટમ મારફતે જ સ્વીકારવામાં આવશે. રૂબરૂ, ટપાલ કે ઈ-મેઇલ દ્વારા મોકલેલા વાંધા માન્ય નહીં રહે.
• ઉમેદવારે વેબસાઇટ પર મૂકેલા માસ્ટર પ્રશ્નપત્રના પ્રશ્ન ક્રમાંક અને વિકલ્પ મુજબ જ વાંધો નોંધાવવાનો રહેશે.
• ઉમેદવારે પોતે ઉત્તરવહીમાં જે જવાબ આપ્યો હોય, તે મુજબનો જ વિકલ્પ વાંધામાં દર્શાવવો જરૂરી છે. બંને અલગ હશે તો વાંધો ગણાશે નહીં.
• વાંધા સાથે આધારભૂત પુરાવા કે અધિકૃત સંદર્ભ અપલોડ કરવા ફરજિયાત છે. માત્ર AI કે GPT આધારિત રજૂઆતો સ્વીકારવામાં આવશે નહીં. ગણતરી આધારિત પ્રશ્નો માટે જરૂરી પદ્ધતિ અને તાર્કિક આધાર રજૂ કરવો પડશે.

આ અંગેની વિગતવાર માહિતી અને માસ્ટર પ્રશ્નપત્ર જોવા માટે આયોગની સત્તાવાર જાહેરાત જોઈ શકાય છે.