ભારતીય કોસ્ટ ગાર્ડમાં નાવિક અને યાંત્રિક પદો પર ભરતી: ૨૧ ઓક્ટોબર સુધી ભરાશે ફોર્મ, જાણો લાયકાત અને વિગત

ભારતીય કોસ્ટ ગાર્ડમાં નાવિક અને યાંત્રિક સહિતના પદો પર ભરતી માટે સ્ટાફ સિલેક્શન કમિશન (SSC) મારફતે ઓનલાઇન અરજીઓ મંગાવવામાં આવી છે. ૬ ઓક્ટોબર ૨૦૨૬ના સવારે ૧૧:૦૦ વાગ્યાથી ફોર્મ ભરવાના શરૂ થઈ ગયા છે અને ૨૧ ઓક્ટોબર ૨૦૨૬ના સાંજે ૫:૩૦ વાગ્યા સુધી અરજી કરી શકાશે. કોસ્ટ ગાર્ડ એનરોલ્ડ પર્સન્સ ટેસ્ટ (CGEPT) બેચ ૦૧/૨૦૨૭ અને ૦૨/૨૦૨૭ હેઠળ આ ભરતી પ્રક્રિયા યોજાશે.

સત્તાવાર જાહેરાત SSC ની વેબસાઇટ પર મૂકવામાં આવેલી નોટિસ પર જોઈ શકાય છે.

કયા પદ માટે કેટલી જગ્યાઓ અને શૈક્ષણિક લાયકાત

કોસ્ટ ગાર્ડમાં વિવિધ કેડર માટે જગ્યાઓ અને લાયકાત નીચે મુજબ નક્કી કરાઈ છે:

• નાવિક (જનરલ ડ્યુટી - GD): માન્ય બોર્ડમાંથી ગણિત અને ફિઝિક્સ વિષયો સાથે ૧૨ પાસ હોવું જરૂરી છે. ૦૧/૨૭ બેચમાં પુરુષો માટે ૧૧૭ અને મહિલાઓ માટે ૧૩ જગ્યાઓ છે. ૦૨/૨૭ બેચમાં પુરુષો માટે ૧૧૭ અને મહિલાઓ માટે ૧૩ જગ્યાઓ છે. પુરુષ ઉમેદવારો માટે ઝોન મુજબ ભરતી થશે, જેમાં ગુજરાત પશ્ચિમ (West) ઝોનમાં આવે છે. મહિલાઓની ભરતી ઓલ ઇન્ડિયા મેરિટ પર થશે.
• નાવિક (ડોમેસ્ટિક બ્રાન્ચ - DB): માન્ય બોર્ડમાંથી ૧૦ પાસ હોવું જરૂરી છે. ૦૨/૨૭ બેચમાં ફક્ત પુરુષો માટે કુલ ૨૫ જગ્યાઓ છે.
• યાંત્રિક (મિકેનિકલ, ઇલેક્ટ્રિકલ, ઇલેક્ટ્રોનિક્સ): ૧૦ પાસ સાથે AICTE માન્ય ૩ કે ૪ વર્ષનો ડિપ્લોમા, અથવા ૧૦ અને ૧૨ પાસ સાથે ૨ કે ૩ વર્ષનો ડિપ્લોમા જરૂરી છે. ૦૧/૨૭ બેચમાં ફક્ત પુરુષો માટે મિકેનિકલમાં ૨૮, ઇલેક્ટ્રિકલમાં ૨૩ અને ઇલેક્ટ્રોનિક્સમાં ૯ જગ્યાઓ છે.
• હાઇજિનિસ્ટ-૧: મેટ્રિક્યુલેશન અથવા ITI કે સમકક્ષ લાયકાત. ૦૨/૨૭ બેચમાં ફક્ત પુરુષ ઉમેદવારો માટે ૨૦ જગ્યાઓ છે.

વય મર્યાદા અને છૂટછાટ

ઉમેદવારની જન્મ તારીખ પદ પ્રમાણે નીચે મુજબ હોવી જોઈએ:

• નાવિક (GD): જન્મ ૧ નવેમ્બર ૨૦૦૫ થી ૧ મે ૨૦૦૯ વચ્ચે થયેલો હોવો જોઈએ (બંને બેચ માટે).
• યાંત્રિક: જન્મ ૧ મે ૨૦૦૫ થી ૧ મે ૨૦૦૯ વચ્ચે થયેલો હોવો જોઈએ (૦૧/૨૭ બેચ માટે).
• નાવિક (DB): જન્મ ૧ નવેમ્બર ૨૦૦૫ થી ૧ ઓક્ટોબર ૨૦૦૯ વચ્ચે થયેલો હોવો જોઈએ (૦૨/૨૭ બેચ માટે).
• હાઇજિનિસ્ટ-૧: જન્મ ૧ નવેમ્બર ૨૦૦૨ થી ૧ ઓક્ટોબર ૨૦૦૯ વચ્ચે થયેલો હોવો જોઈએ (૦૨/૨૭ બેચ માટે).
• ઓબીસી ઉમેદવારોને ઉપલી વય મર્યાદામાં ૩ વર્ષ અને એસસી/એસટી ઉમેદવારોને ૫ વર્ષની છૂટછાટ મળશે.

પસંદગી પ્રક્રિયા અને પરીક્ષા માળખું

ભરતી પ્રક્રિયા ચાર તબક્કામાં લેવાશે:

• સ્ટેજ-૧ (કમ્પ્યુટર આધારિત ઓનલાઇન પરીક્ષા): ૧૦૦ પ્રશ્નોની ઓબ્જેક્ટિવ પરીક્ષા લેવાશે. દરેક પ્રશ્નનો એક ગુણ રહેશે અને પરીક્ષાનો સમય ૧ કલાકનો રહેશે. ખોટા જવાબ માટે કોઈ નેગેટિવ માર્કિંગ નથી. પાસ થવા માટે જનરલ, EWS અને OBC ઉમેદવારોએ ઓછામાં ઓછા ૪૦ ગુણ અને SC/ST ઉમેદવારોએ ૩૫ ગુણ મેળવવાના રહેશે.
• સ્ટેજ-૨ (શારીરિક કસોટી અને ડોક્યુમેન્ટ વેરિફિકેશન): સ્ટેજ-૧ માં પાસ થયેલા ઉમેદવારોની શારીરિક કસોટી (PFT) લેવાશે. પુરુષ ઉમેદવારો માટે ૬ મિનિટ ૩૦ સેકન્ડમાં ૧.૬ કિમી દોડ, ૨૦ ઉઠક-બેઠક, ૧૫ પુશ-અપ્સ અને ૧૫ સીટ-અપ્સ રહેશે. મહિલા ઉમેદવારો માટે ૮ મિનિટમાં ૧.૬ કિમી દોડ, ૧૫ ઉઠક-બેઠક, ૧૦ પુશ-અપ્સ અને ૧૦ સીટ-અપ્સ રહેશે. ત્યારબાદ એસેસમેન્ટ ટેસ્ટ, ડોક્યુમેન્ટ વેરિફિકેશન અને મેડિકલ ટેસ્ટ લેવાશે.
• સ્ટેજ-૩ અને સ્ટેજ-૪: INS ચિલ્કા ખાતે અંતિમ વેરિફિકેશન અને તાલીમ પહેલાંની મેડિકલ તપાસ થશે. છેલ્લા તબક્કામાં પ્રમાણપત્રોની સત્તાવાર તપાસ બોર્ડ અને યુનિવર્સિટી સાથે કરવામાં આવશે.

અરજી ફી અને કેવી રીતે અરજી કરવી

• SC અને ST કેટેગરીના ઉમેદવારો સિવાયના તમામ ઉમેદવારોએ ૫૫૦ રૂપિયા પરીક્ષા ફી ઓનલાઇન ભરવાની રહેશે. SC/ST ઉમેદવારો માટે ફી માફી છે.
• ઉમેદવારોએ સ્ટાફ સિલેક્શન કમિશનની સત્તાવાર વેબસાઇટ www.ssc.gov.in પર જઈને ઓનલાઇન નોંધણી કરવાની રહેશે. ઉમેદવાર ફક્ત કોઈ એક જ પદ માટે અરજી કરી શકશે.
• ફોર્મ ભરતી વખતે લાઇવ ફોટો કેપ્ચર કરવામાં આવશે. ઓનલાઇન અરજીમાં ભરેલી તમામ વિગતો અને અપલોડ કરેલા ડોક્યુમેન્ટ્સ અસલ પ્રમાણપત્રો સાથે મેળ ખાતા હોવા જરૂરી છે.

નોટિસ અનુસાર સ્ટેજ-૧ પરીક્ષા નવેમ્બર ૨૦૨૬ની શરૂઆત કે મધ્યમાં યોજાશે. ઉમેદવારોને ૨૧ ઓક્ટોબર ૨૦૨૬ પહેલાં ફોર્મ ભરી લેવાની સૂચના અપાઈ છે.