ભાવનગર મહાનગરપાલિકા: ૧૦૧ કોપા એપ્રેન્ટીસની પસંદગી યાદી જાહેર, ૧૫ દિવસમાં હાજર થવા આદેશ

ભાવનગર મહાનગરપાલિકાએ મુખ્યમંત્રી એપ્રેન્ટીસ યોજના અને એપ્રેન્ટીસ એક્ટ હેઠળ ‘કોપા’ (COPA) ટ્રેડ માટે ૧૦૧ ઉમેદવારોની પસંદગી યાદી અને વિભાગવાર ફાળવણી જાહેર કરી છે. આ ઉમેદવારોને ૧૨ મહિનાની તાલીમ માટે પસંદ કરવામાં આવ્યા છે અને ૧૫ દિવસમાં મહાનગરપાલિકા ખાતે હાજર થવાનો આદેશ અપાયો છે.

ભાવનગર આઈટીઆઈ ખાતે ૧૭ ઓગસ્ટ ૨૦૨૬ના રોજ યોજાયેલા એપ્રેન્ટીસ ભરતી મેળામાં આવેલી અરજીઓના આધારે આ પસંદગી કરવામાં આવી છે. પસંદ થયેલા ઉમેદવારોને એપ્રેન્ટીસ કોન્ટ્રાક્ટ થયા તારીખથી ૧ વર્ષ માટે વિવિધ વિભાગોમાં મૂકવામાં આવશે.

૧૫ દિવસમાં હાજર થવું પડશે

મહાનગરપાલિકાના મહેકમ વિભાગના દફતરી હુકમ મુજબ પસંદ થયેલા તમામ ૧૦૧ ઉમેદવારોએ ૧૫ દિવસમાં ભાવનગર મહાનગરપાલિકા ખાતે તાલીમમાં હાજર થવાનું રહેશે. જો આ સમયગાળામાં ઉમેદવાર હાજર નહીં થાય તો તેમની નિમણૂક રદ ગણવામાં આવશે અને તે અંગે કોઈ અલગ પત્રથી જાણ કરવામાં નહીં આવે.

સ્ટાઇપેન્ડ અને મહત્વની શરતો

• સ્ટાઇપેન્ડ: પસંદ થયેલા ઉમેદવારને દર મહિને ₹૯,૬૦૦ સ્ટાઇપેન્ડ મળશે.
• મેડિકલ સર્ટિફિકેટ: ભાવનગર મહાનગરપાલિકાના અર્બન પ્રાઇમરી હેલ્થ સેન્ટર (પીએચસી) ખાતેથી શારીરિક યોગ્યતાનું પ્રમાણપત્ર મેળવવાનું રહેશે.
• ઓનલાઇન પ્રોફાઇલ અને કોન્ટ્રાક્ટ: ઉમેદવારોએ Apprenticeshipindia.gov.in પોર્ટલ પર નોંધણી કરી પોતાની પ્રોફાઇલ ભરવી પડશે. કોન્ટ્રાક્ટ જનરેટ કરવા માટે મહેકમ વિભાગ ખાતે રૂબરૂ હાજર થવું પડશે. પ્રોફાઇલ જનરેટ કરતી વખતે આઈડી પ્રૂફ તરીકે આધાર કાર્ડ અને સપોર્ટિંગ ડોક્યુમેન્ટ તરીકે બેંક પાસબુક ફરજિયાત અપલોડ કરવાની રહેશે.
• કામચલાઉ તાલીમ: આ પસંદગી નિયત મુદતની અને તદ્દન કામચલાઉ છે. તેના આધારે ભવિષ્યમાં મહાનગરપાલિકામાં નોકરી અંગે કોઈ કાયદેસર હક્ક દાવો કરી શકાશે નહીં.
• છોડવા અંગે નિયમ: એપ્રેન્ટીસ કોન્ટ્રાક્ટનો સમય પૂરો થતાં પહેલાં જાણ કર્યા વિના તાલીમ છોડી શકાશે નહીં. રાજીનામું આપવું હોય તો મહેકમ વિભાગ સાથે પત્રવ્યવહાર કરીને કોન્ટ્રાક્ટ ટર્મિનેટ કરાવવો પડશે.

ભાવનગર મહાનગરપાલિકાનો સત્તાવાર દફતરી હુકમ અને તમામ ૧૦૧ ઉમેદવારોની નામવાર યાદી અહીં વાંચો.