યુજીસીના પાંચમા સુધારાથી M.PT અને M.OT કોર્સમાં મોટા ફેરફાર, ડિગ્રી સ્પેશ્યલાઇઝેશન સાથે આપવાની રહેશે
યુજીસીની ડિગ્રી નિર્દેશિકામાં થયેલા પાંચમા સુધારા મુજબ હવે M.PT અને M.OT સામાન્ય ડિગ્રી નહીં, સ્પેશ્યલાઇઝેશન સાથે આપવાની રહેશે. B.Optom, B.OT અને BPT જેવા કોર્સની અવધિ પણ વધી છે.
યુનિવર્સિટી ગ્રાન્ટ્સ કમિશન (યુજીસી)એ પોતાની ડિગ્રીનિર્દેશિકા (Specification of Degrees)માં પાંચમો સુધારો નોંધાવ્યો છે. આ અંગેની જાહેરનોટિસ કમિશનના સેક્રેટરી પ્રો. શ્યામા રાઠવે 16 સપ્ટેમ્બર 2026ના રોજ બહાર પાડી છે.
આ સુધારો કેન્દ્ર સરકારની મંજૂરીથી થયો છે અને તે 27 ઓગસ્ટ 2026ના રોજ ભારતના રાજપત્રમાં પ્રસિદ્ધ થયો છે. રાજપત્રમાં જે દિવસે પ્રસિદ્ધ થાય, તે દિવસથી તે અમલમાં આવી જાય છે. આ સુધારો 1956ના યુજીસી એક્ટની કલમ 22(3) હેઠળ કરાયો છે અને 5 જુલાઈ 2014ના પહેલા નોટિફિકેશનમાં ફેરફાર કરે છે.
M.PT અને M.OT હવે સ્પેશ્યલાઇઝેશન સાથે
રાજપત્રમાં એલાય્ડ એન્ડ હેલ્થકેર પ્રોફેશન્સ માટેના રાષ્ટ્રીય આયોગ (NCAHP) હેઠળ આવતી ડિગ્રીઓને મંજૂરી આપવામાં આવી છે. આમાં સૌથી અગત્યની વાત એ છે કે 31 જુલાઈ 2026ના પત્ર મુજબ શૈક્ષણિક વર્ષ 2026-27થી M.PT (માસ્ટર ઓફ ફિઝિયોથેરાપી) અને M.OT (માસ્ટર ઓફ ઓક્યુપેશનલ થેરાપી) કોઈ પણ યુનિવર્સિટી સામાન્ય ડિગ્રી તરીકે આપશે નહીં. આ બંને ડિગ્રી હવે સ્પેશ્યલાઇઝેશન સાથે આપવાની રહેશે.
જેમ કે M.PT (સ્પોર્ટ્સ સાયન્સિસ), M.PT (ન્યુરો), M.PT (ઓર્થો) જેવા નામ સાથે. M.OTમાં પણ મસ્ક્યુલોસ્કેલેટલ સાયન્સિસ, પીડિયાટ્રિક્સ એન્ડ નિયોનેટોલોજી, ન્યુરોસાયન્સિસ, મેન્ટલ હેલ્થ, કાર્ડિયોવાસ્ક્યુલર એન્ડ પલ્મોનરી સાયન્સિસ, રિહેબિલિટેશન, જેરિયાટ્રિક્સ, હેન્ડ અને ઓન્કોલોજિકલ સાયન્સિસ જેવાં સ્પેશ્યલાઇઝેશન રાખવાના છે. 2026-27 પહેલાં એડમિશન લીધેલા વિદ્યાર્થીઓને ડિગ્રી અગાઉના નિયમ મુજબ આપી શકાશે.
અવધિ વધી, નવી ડિગ્રી પણ ઉમેરાઈ
રાજપત્રમાં કેટલીક ડિગ્રીની અવધિ પણ વધારવામાં આવી છે. B.Optom (બેચલર ઓફ ઓપ્ટોમેટ્રી) હવે 4 વર્ષને બદલે 5 વર્ષનો કોર્સ થશે. B.OT (બેચલર ઓફ ઓક્યુપેશનલ થેરાપી) 4.5 વર્ષમાંથી 5 વર્ષનો થયો છે. એ જ રીતે BPT (બેચલર ઓફ ફિઝિયોથેરાપી) પણ 4.5 વર્ષમાંથી 5 વર્ષનો થશે. M.Optom નું સંક્ષિપ્ત નામ બદલાયું છે.
નવી ડિગ્રીઓ પણ ઉમેરાઈ છે, જેમ કે M.MLS (હિસ્ટોલોજી એન્ડ સાયટોપેથોલોજી), B.EMT (પેરામેડિક્સ), M.ACP, B.AOTT અને M.AOTT જેવી ડિગ્રી. એ ઉપરાંત M.Sc. (મેડિકલ બાયોકેમિસ્ટ્રી), M.Sc. (મેડિકલ માઇક્રોબાયોલોજી), M.Sc. (હેમેટોલોજી એન્ડ ટ્રાન્સફ્યુઝન મેડિસિન) જેવી ડિગ્રીના નામ પણ હવે નિર્દેશિકામાં સ્પષ્ટ લખાયેલા છે.
આ ઉપરાંત B.ND (ન્યુટ્રિશન એન્ડ ડાયેટેટિક્સ), M.ND, B.Psy, M.MSW, B.MRIT, M.MRIT, B.RTT, M.RTT, B.PA, B.DTT, B.RT જેવી અનેક ડિગ્રીઓને સ્પષ્ટ સ્વરૂપ, અવધિ અને પ્રવેશયોગ્યતા સાથે મંજૂરી આપવામાં આવી છે. જે યુનિવર્સિટીઓ MPT કે MOT કોર્સ ચલાવે છે, તેમને આ નિયમ મુજબ કોર્સ ગોઠવવાનો રહેશે.
હવે જે વિદ્યાર્થીઓ ફિઝિયોથેરાપી, ઓક્યુપેશનલ થેરાપી કે પેરામેડિકલ કોર્સમાં એડમિશન લેવાની તૈયારી કરે છે, તેમને એડમિશન પહેલાં કોર્સની અવધિ અને ડિગ્રીનું નામ સારી રીતે ચેક કરી લેવું જરૂરી બનશે. અધિસૂચનાની સંપૂર્ણ વિગતો અહીં વાંચો
