વિદ્યાર્થીઓ માટે ગુજરાત કલ્ચરલ એલોક્યુશન કૉમ્પિટિશન શરૂ, 1 લાખ સુધીના ઇનામો

મુખ્યમંત્રી ભૂપેન્દ્ર પટેલે ૨૮ સપ્ટેમ્બરે ગાંધીનગરથી ગુજરાત કલ્ચરલ એલોક્યુશન કૉમ્પિટિશન-2026 શરૂ કર્યું. આ સ્પર્ધા સરકારના ઉચ્ચતર શિક્ષણ વિભાગ અને સેવ કલ્ચર સેવ ઈન્ડિયા ફાઉન્ડેશન સાથે મળીને આખા રાજ્યમાં યોજી છે. કાર્યક્રમમાં વિવિધ યુનિવર્સિટીના વિદ્યાર્થીઓ વિડિયો કોન્ફરન્સથી જોડાયા હતા.

મુખ્યમંત્રીએ કહ્યું કે આ માત્ર સ્પર્ધા નથી, યુવાનોમાં સાંસ્કૃતિક મૂલ્યો વધારવાનું, ચારિત્ર્ય ઘડવાનું અને રાષ્ટ્ર નિર્માણમાં ફાળો આપવાનું મંચ છે. કાર્યક્રમમાં શિક્ષણ મંત્રી ડૉ. પ્રદ્યુમન વાજા, રાજ્ય મંત્રી ત્રિકમભાઈ છાંગા અને સેવ કલ્ચર-સેવ ભારત ફાઉન્ડેશનના સ્થાપક તથા વરિષ્ઠ પત્રકાર ઉદય મહુરકર હાજર રહ્યા હતા.

કોણ ભાગ લઈ શકે અને કેવી રીતે થશે સ્પર્ધા?

સ્પર્ધા ચાર તબક્કામાં થશે — ક્લાસ, કોલેજ, ઝોન અને રાજ્ય લેવલ પર. ભાગ લેવા માટે વિદ્યાર્થીનો જન્મ 1 જાન્યુઆરી 2000 પછીનો હોવો જરૂરી છે. રાજ્યની સરકારી, અનુદાનિત અને સ્વફાયડી કોલેજ તથા યુનિવર્સિટીમાં સ્પર્ધા યોજાશે.

• ક્લાસ લેવલ: દરેક ક્લાસમાં ત્રણ મિનિટનું સ્ક્રીનિંગ રાઉન્ડ થશે, જેમાંથી ત્રણ વિદ્યાર્થી પસંદ થશે. ભાગ લેનારા બધા વિદ્યાર્થીઓને સર્ટિફિકેટ મળશે.
• કોલેજ લેવલ: દરેક ફેકલ્ટીમાંથી એક વિદ્યાર્થી ઝોનલ લેવલ માટે પસંદ થશે. પ્રથમ ક્રમ મેળવનારને રૂ. 1,100 સાથે 'બેસ્ટ સ્પીકર ઓફ કોલેજ' ટ્રોફી અને સર્ટિફિકેટ મળશે.
• ઝોનલ લેવલ: રાજ્યના ૧૧ ઝોનમાં સ્પર્ધા થશે. ભાગ લેનારા ૨૦ ટકા વિદ્યાર્થીઓ રાજ્ય લેવલના ફાઈનલમાં પસંદ થશે. પસંદ થનાર દરેક વિદ્યાર્થીને રૂ. 11,000 સાથે 'કલ્ચરલ સ્પીકર ઓફ ગુજરાત' ટ્રોફી અને સર્ટિફિકેટ મળશે.
• રાજ્ય લેવલ ફાઈનલ: આ તબક્કો કેમ્પના રૂપમાં યોજાશે, જ્યાં પસંદ થયેલા વિદ્યાર્થીઓ નક્કી કરેલા વિષયો પર વકતવ્ય આપશે અને ચર્ચામાં ભાગ લેશે. પ્રથમ, બીજા અને ત્રીજા ક્રમે આવનારને અનુક્રમે રૂ. 1 લાખ, રૂ. 71,000 અને રૂ. 51,000 તથા 'બેસ્ટ કલ્ચરલ સ્પીકર ઓફ ગુજરાત' ટ્રોફી અને સર્ટિફિકેટ મળશે.

સ્પર્ધાના વિષયો

વકતવ્યના મુખ્ય વિષયોમાં નશા મુક્ત ભારત અભિયાન અને સ્વચ્છ સાયબર ભારત મિશન, વિકસિત ભારત @ 2047: આત્મનિર્ભર ભારત, કલ્ચર એન્ડ વેલ્યૂઝ: ધ ફાઉન્ડેશન ઑફ અ નેશન્સ એક્ઝિસ્ટન્સ, એંગરનાં કડવાં પરિણામો અને ભારતીય નાગરિક તરીકેની ફરજો: બંધારણનો કલમ 51(A)નો સમાવેશ થાય છે.

સ્પર્ધા ઉપરાંત વિદ્યાર્થીઓના સર્વાંગી વિકાસ માટે વિવિધ યુનિવર્સિટી અને કોલેજોમાં ઓનલાઈન અને ઓફલાઈન સેમિનાર તથા ટ્રેનિંગ પ્રોગ્રામ પણ યોજાયા છે. તેમાં વકતૃત્વ, લીડરશિપ, સાંસ્કૃતિક અને નૈતિક મૂલ્યો તથા આત્મનિર્ભર ભારત વિશે માર્ગદર્શન અપાશે.

શિક્ષણ મંત્રી ડૉ. પ્રદ્યુમન વાજાએ ભાગ લેનારા વિદ્યાર્થીઓને શુભેચ્છા પાઠવી હતી. તેમણે કહ્યું કે દેશની સાંસ્કૃતિક વિરાસત જાળવવાની અને મજબૂત બનાવવાની જવાબદારી યુવાનો પર છે. એમણે રાષ્ટ્રીય શિક્ષણ નીતિમાં માતૃભાષામાં શિક્ષણ પર ભાર અંગે કહ્યું કે માતૃભાષા વિદ્યાર્થીઓને તેમના મૂળ અને વારસા સાથે જોડે છે.

કાર્યક્રમના અંતે યુવા જૈનાચાર્ય મહર્ષિ વિજયજી મહારાજ, પૂજ્ય બ્રહ્મવિહારી સ્વામી અને પૂજ્ય રમેશભાઈ ઓઝાએ સ્પર્ધાની સફળતા માટે શુભેચ્છા પાઠવી હતી. શિક્ષણ વિભાગના અતિરિક્ત મુખ્ય સચિવ મુકેશ કુમાર, ઉચ્ચતર શિક્ષણ કમિશનર દિલીપ રાણા અને ફાઉન્ડેશનના કોર્ડિનેટર અભય શાહ પણ હાજર રહ્યા હતા.

સત્તાવાર જાહેરાત અહીં વાંચો